 |
||||||||||||||||
 |
|
|
|
|
|
|
||||||||||
|
||||||||||||||||
|
zur Homepage der Roten Funken Köln: |
||||||||||||||||
 |
||||||||||||||||
|
|
|
|
 |
|||
|
|
||||||||||||
|
|
|
Vum 9. bes zom 11. September wor d´r II. Knubbel widder op Jöck. Et Ziel unser disjöhrige Knubbeltour heeß Hamburg. Do wor d´r II. Knubbel ald ens gewäs. Mänch älderem Funk kom die gode Erinnerung an fröhere Zigge huh un et wod ald op d´r Busfahrt Richtung Waterkant gejuuz un gefeix. Noh einer gode Stund Fahrt wod de eeschte Paus engelaht. Wie de Ferkeswürm feele se övver dä Zizies ehr Lunchpakete her. God gestärk un fruh gelaunt gingk et wigger . Nohdäm däm Lühbüggel sing Nassgedecke bes op d´r letzte Droppe geputz wore, wod et Zigg för dä nöchste Zweschestopp. Em „Gut Altona“ han mer lecker gemüffelt un sech su ganz höösch an dat dortige Bier gewennt. De Stemmung wod immer besser un och et Sönnche dät kräftig laache. Am fröhe Nohmeddag hatte mer uns Ziel erreich. En dä vergangene Johre han mer en vell renomeete Hutels logeet ävver met däm disjöhrige Nobelschuppen „Mariott am Gänsemarkt“ hat unser neue Knubbelvürstand bei singer Premierenfahrt secherlich d´r Vugel avgeschosse. Des Ovends gingk et en d´r « Gröninger Braukeller », wat dä äldeste Bräues en Hamburg es. En nem urige Kellergewölbe wod dat selvsgebräute Bier us Pittermännche probeet. Wenn et kei Kölsch göv künnt mer sech jo dran gewenne. Et Esse wod op grosse Holzplaate serveet. Dozo spellten ne Musikus Hamburger Seemannsleeder. Em Nu hatten mer dä Quetschenbüggelsquäler su wigg, dat hä nor noch kölsche Leeder spellen dät. Als dä ganze Keller Viva Colonia singen dät hat och dä letzte Knubbelfründ sing Betriebstemperatur derart erreicht, dat et Zigg wor sech jet de Bein zo vertredde. Bald troke mer Rechtung St. Pauli wo sech jederein nach singer Fazung et rechtige Stammlokal söke kunnt. Am Nöchste Morge kom dat ,wat emmer kumme moß wenn mer en Hamburg es. Et gingk op et Wasser. Bei herrlichem Sunnesching han mer de Binnen-und Außenalster erkundet. Donoh gov et em Alsterpavillon en klein Zweschemahlzeit un lecker Pils. Die mieste Fründe han sech des Nommedags jet usgeräst. Bes op ne harte Kern vun Funkefründe, die am späde Nommedag allemol em Alsterpavillon soße. Ävver nit mih em Souterrain, nä se hatte et geschafft sich bes op de Terrasse zo bewäge. Des Ovends gingk et en Schlips un Krage zom grosse Galadiner en et „Restaurant Elba“, wat akkurat am Elbufer , vis a vis vum Hamburger Hafen log. Dat wor e Erlebnis wie die Überseescheffe an uns vorbeitroke . Fründlich wie mer Funke nor ens sin, woodte alle Pött met dreimol Kölle Alaaf begröß. Spät en d´r Naach verleeße mer dat Lokal öm op Heim aanzegonn. Wat e Pech dat unser Heimweg widder direktemang durch St. Pauli fohte. Ävver do moote mer durch, mer günnt sech jo söns nix. Am Sonndag sin mer dann noch ens mem Scheff gefahre . Dismol ging et met ner Barkasse durch d´r Hamburger Hafen , elans d´r Speicherstadt un de Elbe erav. Jode Drei Stund wore mer an Bord un kunnte uns bei Speis un Trank ganz genöglich vun d`r Hansestadt Hamburg veravscheede. En Kölle widder wohlbehalde aangekumme meinten Alle, „för unser neue Knubbelvürstand wor et en gelungene Premierentour“. |